“Sumqayıt Tekstil” MMC-dəki dövlət payının satışı ilə bağlı investisiya müsabiqəsinə yekun vurulub. Sumqayıt24 bu haqda 2 avqust tarixində Əmlak Məsələləri Dövlət Xidmətinə (ƏMDX) istinadən xəbər verir.
Komissiya tərəfindən zərflər açılıb və iddiaçıların təklifləri qiymətləndirilib. Daha əlverişli şərtlər təklif edən “Sumqayıt Texnologiyalar Parkı” MMC müsabiqənin qalibi seçilib.
Şirkətlə alqı-satqı müqaviləsi imzalanıb. Sazişə uyğun olaraq, investor dövlət büdcəsinə 5 milyon manatın köçürülməsi, həmçinin 2 il ərzində müəssisədə 9,1 milyon manat həcmində İnvestisiya Proqramının icrası öhdəliklərini götürüb.
İnvestisiya Proqramı çərçivəsində müasir avadanlıqların, nəqliyyat vasitələri və texnikanın, xammalın alınması, tikililərin təmiri və yenidən qurulması, infrastrukturun təkmilləşdirilməsi nəzərdə tutulur. Müsabiqə qalibi investisiya qoyuluşları nəticəsində müəssisədə 350 yeni iş yerinin yaradılmasını planlaşdırır.
