Sumqayıt Dövlət Universiteti (SDU) "QS Dünya Universitetləri Reytinqi: Avropa 2026" siyahısında 531–540-cı yerlər arasında qərarlaşıb.
Sumqayit24.az xəbər verir ki, universitet ötən illə müqayisədə ümumi balını 12,5-dən 20,3-ə yüksəldib. Bu da 62% artım deməkdir.
Nəticədə SDU əvvəlki illərdə Avropa universitetlərinin 29.6%-ni, indi isə artıq 44%-ni geridə qoyub.
Qeyd edək ki, Avropanın 42 ölkəsində fəaliyyət göstərən 5000-dən çox universitet arasından yalnız 958 ali məktəb bu reytinqə düşüb. SDU-nun bu siyahıda yer alması və mövqeyini yaxşılaşdırması önəmli uğur sayılır.
Sumqayıtın universiteti müəllim–tələbə nisbətinə görə Avropanın ən yaxşı 50 universiteti arasındadır, akademik reputasiya və işəgötürənlər arasında reputasiya göstəricilərinə görə isə ilk 301 universitet sırasındadır.
Bundan əlavə, SDU Qərbi Asiya regionu üzrə ilk 50-likdə yer alıb, Azərbaycandan siyahıya düşən 15 universitet arasında 9-cu olub, ölkənin regional universitetləri arasında isə 1-ci yerə çıxıb.
Qısaca desək, SDU son bir ildə ciddi irəliləyiş əldə edib və Avropa səviyyəsində mövqeyini gücləndirib.
