Sumqayıtda keçmiş məcburi köçkünlərin bir qismi pis şəraitdə yaşayır. Sumqayıt24 bu haqda 10 noyabr tarixində xəbər verir.
Həmin 14 məcburi köçkün ailəsi 25 ildir ki, baxımsız qalmış 70 saylı bağçada məskunlaşıb. Yağış yağan zaman bağçanın həyəti keçilməz olur, damı isə su buraxır. Həmçinin zirzəmidə yığılan çirkab sular ətrafa üfunət saçır. Bu isə ağcaqanadların yayılmasına səbəb olur.
Sakinlərin sözlərinə görə, İcra Hakimiyyəti və bağçanın müdirinə kömək üçün dəfələrlə müraciət ünvanlanıb. Lakin problemə göz yumulur:
“Hər evdə azı iki uşaq var. Zirzəminin iyindən nəfəs almaq olmur. Müdirə ağcaqanadlar barədə dediyimizdə, cavab olaraq dərman yandırmağı tövsiyə etdi. Bu, ələ salmaqdır. Əvvəllər gəlib dərman vururdular. İndi o da yoxdur. Bizimlə heç kim maraqlanmır”.
