Külli miqdarda dələduzluqda təqsirləndirilən Bakı Dövlət Universitetinin sabiq müəllimi Həcər Mikayılovanın məhkəməsi keçirilib. Sumqayıt24 bu haqda 14 sentyabr tarixində Lent.az-a istinadən xəbər verir.
Bakı Ağır Cinayətlər Məhkəməsində hakim Əhməd Quliyevin sədrliyi ilə baş tutan prosesdə qərar qəbul edilib. Qərara əsasən, Həcər Mikayılovanın işi baxılması üçün Bakı Ağır Cinayətlər Məhkəməsindən Sumqayıt Ağır Cinayətlər Məhkəməsinə verilib.
Qeyd edək ki, o, özünü Belarusdan Azərbaycana toyuq məhsulları idxal edən şirkət rəhbərləri Anar İsmayılov və Qüdrət Həsənova oğlunun direktoru olduğu “MİN 300” MMC-nin faktiki sahibi kimi təqdim edib. Bu yolla idxal etdikləri ümumilikdə 80 ton məhsulun əvvəldən tanıdığı saxlanca yerləşdirilməsinə nail olub. H. Mikayılova bir müddət sonra məhsulu saxlancdan çıxararaq satışını təşkil edib və əldə olunan 332 min manatı ələ keçirib.
Eks-pedaqoq, həmçinin daha bir zərərçəkmiş Məzahir Dostuyevə torpaq çıxarışı almasına kömək edəcəyi vədi ilə ondan 12 min manat alıb. Sözügedən əməllərə görə, Həcər Mikayılovaya Cinayət Məcəlləsinin 178.3.2-ci (dələduzluq külli miqdarda törədildikdə) maddəsi ilə cinayət işi açılıb. Onun barəsində həbs qətimkan tədbiri seçilib.
Qeyd edək ki, H. Mikayılova əvvəllər Bakı Dövlət Universitetinin Coğrafiya fakültəsində baş müəllim olub.
