Sumqayıt Apellyasiya Məhkəməsində dələduzluq edən Mahir İmranlının (ad, soyadı şərtidir) apellyasiya şikayətinə baxılıb.
Pravda.az-ın məlumatına görə, hakim Rəşadət Ağayevin sədrliyi ilə keçirilən prosesdə qərar elan olunub.
Qərara əsasən, Sumqayıt Şəhər Məhkəməsinin 30 sentyabr 2024-cü il tarixli hökmü apellyasiya şikayətinə əsasən dəyişdirilib, onun 4 il 6 ay müddətinə azadlıqdan məhrumetmə cəzası 3 il 6 aya endirilib.
Sumqayıt Şəhər Məhkəməsinin hökmü ilə zərərçəkmiş şəxsə dəyən ziyan hesabına tutulması qət edilən 13.500 manat məbləği 8500 manat məbləğinədək azaldılıb.
İttihama görə, Mahir İmranlı tanışı, zərərçəkmiş M.M.-in nəvəsini hüquq-mühafizə orqanlarına işə düzəldəcəyinə dair yalan vəd verib. O, bu yolla 2021-2022-ci illərdə Bakı şəhəri, Yasamal rayonu ərazisində zərərçəkmiş şəxsdən ümumilikdə 25.000 manat pulu dələduzluq yolu ilə ələ keçirib.
Bundan başqa, Mahir İmranlı tanışı, zərərçəkmiş S.S.-in arvadını Bakı şəhərinin orta məktəblərinin birində informatika müəllimi kimi işə düzəldəcəyinə dair yalan vəd verərək, 07 oktyabr 2022-ci il tarixdə Sumqayıt şəhərində yerləşən "Yaşıl ada" restoranının qarşısında 13.800 manat pulunu alıb.
