Sumqayıtda bina sakinləri ilə sədr arasında qalmaqal yaşanıb. Sumqayıt24 bu haqda 12 avqust tarixində xəbər verir.
“Sumqayıt 4” MMC-nin binasında yaşayan sakinlər özbaşınalıqlardan şikayətçidirlər. Burada su və qaz vaxtında gəlmir, liftlər yaxşı işləmir, bu azmış kimi, əvvəlki sədr Ramazan Qasımov sakinlərdən xəbərsiz binaya Əhməd İsayev adlı şəxsi sədr seçib. Məhz bu səbəbdən insanlar kommunal ödənişləri verməkdən imtina ediblər. İddiaya görə, toplanan vəsaitlər təyinatı üzrə xərclənmir və sakinlər öz istədikləri şəxsi sədr görmək istəyirlər.
Sədr Əhməd İsayev məsələ ilə bağlı Den.az-a açıqlama verib. O, iddiaları təkzib edərək, binaya tam qanuni seçildiyini bildirib:
“Özüm də həmin binanın sakiniyəm. İddialara gəlincə isə sakinlər yığılıb qalan kommunal borclarını ödəməmək üçün bu addımı atıblar”.
Şikayətçilər problemlə bağlı məhkəməyə müraciət ünvanladıqlarını qeyd ediblər.
