Sumqayıtda fəhlənin üzərinə 65 min manat borc yığıblar. Sumqayıt24 bu haqda 16 oktyabr tarixində Sumqayit.tv-yə istinadən xəbər verir.
Şirkətlərin birində çalışan Rövşən Yusuflu Xırdalanda tanışı tərəfindən aldadıldığını iddia edir. Onun sözlərinə görə, Rövşən Rüstəmov adlı şəxs onun etibarından sui-istifadə edərək sosial yardım düzəltmək adı altında VÖEN açıb. Rövşən Yusuflu baş verənlərdən Vergilər Nazirliyindən gələn zəngdən sonra agah olub. Məlum olub ki, 3 il öncə adına açılan VÖEN-lə onun 65 min manat vergi borcu yığılıb. Ölkədən çıxışına qadağa qoyulub. Onu aldadan şəxslə əlaqə saxlamaq istəsə də, telefonuna zəng çatmayıb.
Zərərçəkmiş onu aldadan şəxs barəsində aidiyyəti qurumlara məlumat verəndə şok yaşayıb. Sən demə Rövşən Rüstəmov müdiri Samir Nəcəfov və digər şəxslərlə əlbir olaraq başqa vətəndaşlara qarşı da bu dələduzluğu edib.
Yusuflunun şikayəti əsasında işin təşkilatçısı olan Samir Nəcəfovun saxlanıldığı bildirilir. Fakt üzrə araşdırma aparılır.
