Dələduzluq və hədə-qorxu ilə tələb etməkdə təqsirləndirilən jurnalist Cəmil Məmmədlinin məhkəməsi olub. Sumqayıt24 bu haqda 8 sentyabr tarixində Lent.az-a istinadən xəbər verir.
Sumqayıt Ağır Cinayətlər Məhkəməsində hakim Fəhmin Hümbətovun sədrliyi ilə keçirilən prosesdə ittiham aktı elan olunub.
Daha sonra zərərçəkmiş Fuad Həbibov ifadə verərək bildirib ki, Cəmil Məmmədlini 2017-ci ildə tanıyıb:
"Anam Nəcimə Babayevanın qətli ilə bağlı 7 ildir ki, iş açılmırdı. Məsələni ictimailəşdirmək istəyirdik.
Cəmil Məmmədli ilə tanış olduq. Mənə dedi ki, anamın ölüm işində məmurların əli var, bu barədə məlumatları paylaşacaq. Bu adla ayrı-ayrı vaxtlarda bacım Gülnarə Həbibovadan ümumilikdə 6500 manat aldı. Sonra bu pulun müqabilində heç bir iş görmədiyini bilib ondan ayrıldıq. Bir il sonra Cəmil Məmmədli mənə zəng vurub dedi ki, Nəcimə Babayevanın qətli ilə bağlı Dövlət Təhlükəsizlik Xidmətində (DTX) xüsusi qrup yaradılıb, işi araşdırmağa gəlirlər. Bizimlə yenidən görüşdü, mənə səs atdı və dedi ki, bu, DTX-nin polkovnikidir. Bir dəfə də mənə zəng vuraraq, guya Nabranda sabiq nazir Ramil Usubovun oğlu ilə çay içdiyini bildirdi və məndən məlumatlar atmağımı istədi. Bu adla da məndən ayrı-ayrılıqda 3500 manat aldı".
Fuad Həbibov əlavə edib ki, jurnalist onlardan pul tələb etməyib:
“Özümüz vermişik”.
Cəmil Məmmədlinin vəkili Fariz Namazlı zərərçəkəndən pulun verilməsi ilə bağlı hər hansı sübutun olub-olmadığını soruşub. Fuad Həbibov sübutunun olmadığını deyib.
Müdafiəçilərin suallarını cavablandıran zərərçəkmiş qeyd edib ki, pulları Cəmil Məmmədliyə verərkən onun səsini yazmayıb.
Proses oktyabrın 5-də davam edəcək.
Xatırladaq ki, Cəmil Məmmədli Cinayət Məcəlləsinin 178.2.4 (dələduzluq-xeyli miqdarda ziyan vurmaqla törədildikdə), 182.2.1 (hədə-qorxu ilə tələb etmə - qabaqcadan əlbir olan bir qrup şəxs tərəfindən törədildikdə) 182.2.2 (təkrar hədə-qorxu ilə tələb etmə) və 221.2.2-ci (xuliqanlıq) maddələri ilə ittiham olunur.
