Sumqayıt Məşğulluq Mərkəzinin sabiq baş məsləhətçisi Rövşən Xəlilov və tanışı Gülgün Nəsirovaya hökm oxunub. Sumqayıt24 bu haqda 28 oktyabr tarixində Qafqazinfo.az-a istinadən xəbər verir.
Onlar rüşvət almaqda və digər əməllərdə təqsirləndirilirlər. Sumqayıt Ağır Cinayətlər Məhkəməsində R. Xəlilova 2 il məsul vəzifə tutmaq hüququndan məhrum edilməklə 8 il 6 ay həbs cəzası verilib. Onun tanışı G. Nəsirova isə 1 il 6 ay məsul vəzifə tuta bilməyəcək və 5 il 3 ay həbsdə olacaq. Hər iki şəxs məhkəmə zalındaca həbs edilib.
Qeyd edək ki, onlar qabaqcadan əlbir olaraq aldatma yolu ilə müxtəlif şəxslərə məxsus ümumilikdə 4900 manatı ələ keçirərək, Xəlilovun işlədiyi quruma məxsus olmaqla ona etibar edilmiş ümumilikdə 6200 manat məbləğində özgə əmlakını təkrarən israf etməklə talayıblar.
Həmçinin faktiki olaraq işləməyən, lakin formal əmək müqavilələri bağlanmış şəxslərə ünvanlı dövlət sosial yardım təyin edilməsi üçün 11.200 manatı rüşvət qismində alaraq, ayrı-ayrı şəxsləri rüşvət verməyə təhrik edərək, eləcə də qanunsuz əməllərini ört-basdır etmək məqsədilə informasiya resursuna bilə-bilə yalan məlumatlar daxil edərək vəzifə saxtakarlığı törədiblər.
Toplanmış sübutlar əsasında Rövşən Xəlilov və Gülgün Nəsirova Cinayət Məcəlləsinin 178.2.3 (şəxs tərəfindən öz qulluq mövqeyindən istifadə etməklə törədilən dələduzluq), 179.2.3 (şəxs tərəfindən öz qulluq mövqeyindən istifadə etməklə törədilən israf etmə), 311.3.2 (təkrar rüşvət alma), 32.4,312.2 (rüşvət verməyə təhrik etmə) və digər maddələri ilə təqsirləndirilən şəxslər qismində məsuliyyətə cəlb olunublar.
