Sumqayıt şəhərində kişi həyat yoldaşına xəsarət yetirib.
Demokrat.az-ın əldə etdiyi məlumata görə, hadisə Sumqayıtçay qəsəbəsində baş verib. Belə ki, 30 yaşlı Fəqan fərdi yaşayış evində aralarında yaranmış ailə münaqişəsi zəminində mübahisə zamanı həyat yoldaşı Könülün (adlar şərtidir – red.) kürəküstü və sol qol nahiyyələrinə dəmir mala aləti ilə vurub.
Hadisəni törədən Fəqanın barəsində Cinayət Məcəlləsinin 128-ci (qəsdən sağlamlığa zərər vurma) maddəsi ilə ittiham elan edilib.
İş üzrə ifadə verən Fəqan ona elan olunan ittiham üzrə özünü təqsirli bilib. O bildirib ki, hadisə günü işdən, yəni gecə növbəsindən gəldikdən sonra evinin həyətində iş görən zaman həyat yoldaşı ilə aralarında mübahisə yaranıb:
"Əlimdəki "mala" ilə həyat yoldaşımın baş və çiyin nahiyyəsindən 2 dəfə vurdum. Hazırda zərərçəkmiş şəxslə barışmışam. Əməlimdən peşmanam".
İş üzrə zərərçəkmiş Könülün sözlərinə görə, həyat yoldaşı işdən gecə növbəsindən gəldikdən sonra aralarında pul məsələsi ilə bağlı mübahisə yaranıb:
"Nəticədə əlindəki "mala" ilə mənim baş, qol və çiyin nahiyyələrimdən vurdu. Fəqan yuxusuz və əsəbi olduğu üçün etdiyi əməlindən peşman olaraq evdən getdi".
Bu işə Sumqayıt Şəhər Məhkəməsində baxılıb. Məhkəmədə məlum olub ki, təqsirləndirilən şəxs zərərçəkmişlə barışıb. Bu səbəbdən də zərərçəkən şikayətini geri götürüb.
Məhkəmənin hökmü ilə təqsirləndirilən şəxsin barəsində olan cinayət təqibinə xitam verilib. O, cinayət məsuliyyətindən azad edilib.
