Sumqayıtda keçirilən müəllimlərin attestasiyası imtahanı ilə bağlı ciddi narazılıqlar yaranıb.
S. Rüstəmov adına 3 saylı Musiqi Məktəbi və Bülbül adına 2 saylı Musiqi Məktəbinin müəllimləri bununla bağlı Sumqayit24.az-a danışıblar. Onlar imtahanın düzgün təşkil olunmadığını, obyektivlik prinsiplərinin pozulduğunu və nəticələrin ədalətsiz şəkildə qiymətləndirildiyini bildirirlər.
İmtahana hazırlıq üçün kifayət qədər vaxt ayrılmadığını vurğulayan müəllimlər, imtahan tarixinin dəfələrlə dəyişdirildiyini və son anda onlara verilən proqramın real tələblərə uyğun olmadığını qeyd edirlər. Xüsusilə, bəzi sualların ümumiyyətlə verilmədiyi halda, müəllimlərin cavab vermədiyi kimi qeydə alınması və bunun nəticəsində onların aşağı bal alması böyük narazılıq yaradıb.
Musiqi məktəblərində dərs deyən müəllimlər vurğulayırlar ki, musiqi sənətində əsas bacarıq ifaçılıqdır. İmtahan zamanı əsərlərini peşəkar səviyyədə ifa etmələrinə baxmayaraq, onlara proqramdan kənar akademik suallar verilib. Məsələn, bəzi müəllimlər Bethovenin bütün sonatalarının tonal analizini bilmədiklərinə görə qeyri-kafi nəticə alıblar. Halbuki, bu cür detallı akademik biliklər onların gündəlik pedaqoji fəaliyyətində əsas rol oynamır.
Əvvəlcədən müəllimlərə kəsilmə olmayacağı və imtahanın sadəcə bilik səviyyəsinin qiymətləndirilməsi məqsədi daşıdığı deyilsə də, artıq bəzi məktəblərdə müəllimlərə işdən azad olunmaları ilə bağlı rəsmi bildirişlər təqdim edilib. Bu isə onların illərdir qurduqları pedaqoji karyeralarını təhlükə altına qoyur və musiqi təhsili sahəsində ciddi boşluqların yaranmasına səbəb ola bilər.
Narazı müəllimlər müvafiq qurumlara müraciət edərək attestasiya nəticələrinin yenidən nəzərdən keçirilməsini, obyektiv qiymətləndirmə aparılmasını və haqsız yerə işini itirən müəllimlərə ikinci şans verilməsini tələb edirlər. Onlar ümid edirlər ki, bu haqsızlığa qarşı tədbirlər görüləcək və onların səsləri eşidiləcək.
View this post on Instagram
