Xüsusi müsadirə edilmiş əmlak kompleksi (avadanlıqları ilə birlikdə) hərraca çıxarılacaq. Sumqayıt24 bu haqda 2 avqust tarixində Əmlak Məsələləri Dövlət Xidmətinə (ƏMDX) istinadən xəbər verir.
Qurum sentyabrın 1-də saat 11:00-da növbəti hərrac keçirəcək. Burada satışa çıxarılacaq Sumqayıt şəhəri, Kimyaçılar qəsəbəsi, ev 1 ünvanında yerləşən əmlakın start qiyməti 25 milyon 890 min manat olacaq.
Hərracda iştirak etmək istəyən fiziki və hüquqi şəxslər əmlaka sifariş vermək üçün Əmlak Xidmətləri Məkanına müraciət edə bilərlər. Hərraclarda sifariş və digər zəruri sənədləri təqdim etmiş, satılan əmlakın ilkin satış qiymətinin 10% həcmində behi ödəmiş hüquqi və fiziki şəxslər iştirak edə bilərlər.
Sifarişlər Əmlak Xidmətləri Məkanında (Bakı şəhəri, Nizami rayonu, Xəlil Rza Ulutürk küçəsi, 20 ünvanında) hərracın keçirilməsinə ən geci 3 bank günü qalanadək qəbul edilir.
