Sumqayıt şəhər, Kottec yaşayış massivinin 25-ci məhəlləsində yerləşən qurumuş tut ağacı şəhər sakini Ülviyyə Məmmədovanın və ailəsinin ciddi narahatlığına səbəb olub. Onun sözlərinə görə, ağacı qurd basıb və bu zərərvericilər artıq evə qədər yayılıb.
Ülviyyə Məmmədova Xebele.com-a bildirib ki, həşəratlar evə dolub, uşaqlarda allergik reaksiyalar, qaşınma və səpkilər yaranıb:
"Artıq 3 azyaşlı övladımı həyətə buraxa bilmirəm. 1 yaş 7 aylıq qızımda allergiya baş qaldırıb. Qurdlar evin hər yerinə yayılıb. Yaşayış üçün təhlükə yaranıb", – deyə ana qeyd edir.
Sakin daha əvvəl Yaşıllaşdırma idarəsi və MİS-ə yazılı şəkildə müraciət etdiyini, əməkdaşların isə hadisəyə qeyri-ciddi yanaşdığını bildirir:
"Sadəcə bir neçə budağı kəsdilər. Qurdlar budaqlarda qaldı. İndi isə zəng edirik, bildirirlər ki, Yaşma adlanan ərazidə işləyirlər və gəlib baxa bilmirlər. Deyirik ki, evimizi qurd basıb, uşaqların səhhəti təhlükədədir, cavab verirlər ki, "neyləyək?!”
Ülviyyə Məmmədova tələb edir ki, qurdlu və qurumuş ağacın kəsilməsi təmin olunsun və ərazi dərmanlansın. O qeyd edib ki, əgər tədbir görülməzsə, aidiyyəti dövlət orqanlarına şikayətlərini davam etdirəcək.
