Tatarıstan iş adamları Sumqayıta gəliblər. Sumqayıt24 bu haqda 29 iyul tarixində xəbər verir.
Rusiya Federasiyasının Tatarıstan Respublikasının sənaye və ticarət nazirinin müavini German Lerner, “Ximqrad” SC-nin baş direktoru Ayrat Qizzatullin və müxtəlif sahələrdə fəaliyyət göstərən 15-ə yaxın şirkətin rəhbərləri Sumqayıt Kimya Sənaye Parkı ilə tanış olublar.
İqtisadi Zonaların İnkişafı Agentliyinin (İZİA) idarə heyətinin sədri Elşad Nuriyev ölkəmizdəki sənaye zonaları və aqroparklar, sahibkarlar üçün mövcud investisiya imkanları, vergi və gömrük güzəştləri barədə məlumat verib. Sonra sənaye zonaları və aqroparkların təqdimatı keçirilib. Həmçinin əməkdaşlıqdan söz açılıb.
Tatarıstanda sənayenin müxtəlif sahələrində fəaliyyət göstərən şirkətlərin nümayəndələri müəssisələrinin fəaliyyətindən danışıblar.
Sonda sənaye parklarına sərmayə yatırılmasının prespektivləri müzakirə olunub, fikir mübadiləsi aparılıb və suallar cavablandırılıb.
Daha sonra qonaqlar Sumqayıt Kimya Sənaye Parkında görülmüş işlərlə, Sənaye Parkının rezidenti “STP” MMC-nin Kabel və Elektrik avadanlıqları zavodlarında istehsal prosesləri ilə tanış olublar.
