Sumqayıtda təhlükəli Sezium-137 radioaktiv maddəsi aşkarlanıb. Sumqayıt24 bu haqda 14 sentyabr tarixində xəbər verir.
Nüvə tədqiqatları departamenti tərəfindən şəhər ərazisində anomal radiasiya göstəricilərinə malik sahə tapılıb. Nəticələr təsdiqləndikdən sonra aidiyyəti dövlət qurumlarına məlumat verilib.
Nüvə və Radioloji Fəaliyyətin Tənzimlənməsi üzrə Dövlət Agentliyi tərəfindən Sumqayıta yaxın istehsalat sahəsində radioloji şəraitin araşdırılmasına İRİA-nın nüvə tədqiqatları departamentinin mütəxəssisləri də cəlb olunublar.
Mütəxəssislər digər qurumların əməkdaşları ilə birlikdə radiometrik-dozimetrik və spektrometrik ölçülər aparıblar. Həmçinin ərazidə yüksək radiasiya təhlükəli zonanın müəyyən edilməsi məqsədi ilə nüvə-radioloji sınaq işləri görülüb.
Agentlik tərəfindən hazırda müxtəlif ölkələrdə belə halların aradan qaldırılması zamanı cavab tədbirləri üzrə analitik planlar öyrənilərək təhlil edilir və öyrənilmiş dərslər ümumiləşdirilir. Aşkarlanan radiasiya təhlükəli zonanın minimum zərərlə aradan qaldırılması ilə bağlı təkliflər yaxın günlərdə müvafiq qurumlara operativ şəkildə təqdim ediləcək.
