Sumqayıt Tibb Mərkəzi uşaqların peyvəndlənməsi ilə bağlı maarifləndirmə işləri aparır, valideynlər vaksinasiya prosesinə cəlb edilirlər. Sumqayıt24 bu haqda 7 sentyabr tarixində xəbər verir.
Sözügedən proses 4 nömrəli Ailə Sağlamlıq Mərkəzində həyata keçirilir. Ailə həkimi, pediatr Nərmin Əmirova maarifləndirmə işlərinin müsbət nəticə verdiyini bildirib.
O, qızılcanın kəskin yoluxucu virus xəstəliyi olduğunu, hazırda bir çox ölkələrdə intensiv formada yayıldığını vurğulayıb:
“Artıq bir çox ölkələrdə qızılca xəstəliyinin geniş yayılması müşahidə olunur. Virus orqanizmə hava-damcı yolu ilə keçir və əsasən, uşaqlar arasında yayılır”.
Həkimin sözlərinə görə, bu xəstəlik üçün yaş həddi yoxdur. Lakin infeksiyanın ağırlaşması xüsusilə 5 yaşa kimi uşaqlar üçün daha qorxuludur. Bu səbəbdən Nərmin Əmirova valideynləri uşaqların sağlamlığına daha ciddi yanaşmağa və peyvənddən yayınmamağa çağırıb.
