1 nömrəli Sumqayıt şəhər Xəstəxanası ilə bağlı Cebheinfo.az-a daxil olan iddialara görə, tibb müəssisəsində aparılan öd kisəsi əməliyyatı zamanı xəstənin qaraciyəri zədələnib və məhz bu hadisə səbəbindən Mətləb Musayev baş həkim vəzifəsindən azad olunub.
Bununla yanaşı, tibb müəssisəsində mövcud şəraitlə bağlı da narazılıqlar səsləndirilir. Qış mövsümü olmasına baxmayaraq, bəzi şöbələrdə istilik təchizatının normal işləmədiyi, radiatorların bir hissəsinin sıradan çıxdığı, nəticədə pasiyentlərin və tibbi personalın soyuq şəraitdə qalmaq məcburiyyətində olduğu bildirilir. Eyni zamanda, dəhlizlərdə və bəzi otaqlarda işıqlandırma ilə bağlı problemlərin olduğu da iddia olunur.
Sumqayit24.az iddiaların nə dərəcədə doğru olub-olmadığını öyrənmək üçün Sumqayıt Tibb Mərkəzinə (STM) sorğu ünvanlayıb. Qurumdan sorğumuza cavab olaraq bildirilib ki, Sumqayıt Tibb Mərkəzinin tabeliyində fəaliyyət göstərən tibb müəssisələri ilə bağlı səsləndirilən iddialar diqqətlə araşdırılır və mövcud qanunvericiliklə tibbi protokollar çərçivəsində qiymətləndirilir:
"1 nömrəli Şəhər Xəstəxanasında baş vermiş kadr dəyişikliyi ilə əlaqədar qeyd edirik ki, Mətləb Musayev öz istəyi ilə 09.01.2026-cı il tarixində Mərkəzin direktoru Elnur Azadxanovun əmri əsasında baş həkim vəzifəsindən azad olunaraq ixtisasına uyğun olaraq Urologiya şöbəsində həkim-uroloq vəzifəsinə keçirilib.
Kadr dəyişiklikləri planlı idarəetmə və kadr siyasəti çərçivəsində həyata keçirilir. Hazırda xəstəxananın idarə olunması qüvvədə olan qaydalara uyğun təmin olunur. Əməliyyat zamanı tibbi yanlışlıqla bağlı iddialarla əlaqədar bildiririk ki, daxil olan hər bir şikayət müvafiq qaydada araşdırılır.
Sözügedən fakt hazırda araşdırma mərhələsindədir və rəsmi tibbi ekspertiza rəyi olmadan yekun qiymətləndirmə aparıla bilməz. Araşdırmanın nəticələrinə uyğun olaraq zəruri tədbirlər görüləcək. Xəstəxanada istilik və işıqlandırma ilə bağlı məsələlərə gəlincə, maddi-texniki vəziyyət mütəmadi nəzarətdə saxlanılır, yaranan texniki nasazlıqlar operativ şəkildə aradan qaldırılır.
Sumqayıt Tibb Mərkəzinin əsas prioriteti pasiyentlərin təhlükəsizliyi, tibbi xidmətlərin keyfiyyəti və müvafiq şəraitin təmin olunmasıdır. Daxil olan bütün müraciətlər obyektiv şəkildə araşdırılır".
