Sumqayıtlı alim Kənan Aslanlının “Rusiyanın Xarici Enerji Siyasəti: Resurslar, Aktorlar, Konfliktlər” kitabı nüfuzlu beynəlxalq nəşriyyat tərəfindən yayılıb. Bu haqda 7 sentyabr tarixində Sumqayıt24 Sumqayıtxeber.com-a istinadən məlumat verir.
“Routledge” nəşriyyatı tərəfindən çap olunan kitabda Rusiyanın xarici enerji siyasəti və enerji konfliktləri 1991-2022-ci illəri əhatə edərək analoji tədqiqatlarla müqayisədə daha uzun zaman intervalında araşdırılmışdır.
Burada Rusiyanın enerji sahəsində (xam neft, neft məhsulları, təbii qaz, kömür, nüvə enerjisi, elektrik enerjisi) xarici şirkətlər, hökumətlər və hətta beynəlxalq təşkilatlarla münasibətlərində ortaya çıxan enerji konfliktlərinin səbəb və nəticələrinin detallı təhlili aparılıb.
Qeyd edək ki, Kənan Aslanlı Sumqayıt şəhərində yaşayıb və burada 20 nömrəli məktəbdə təhsil alıb. O, hazırda Ankara Yıldırım Beyazıt Universitetinin (AYBU) Beynəlxalq iqtisadi inteqrasiya kafedrasının müəllimi kimi çalışır.
