Sumqayıt məktəbliləri Elm və Təhsil Nazirliyinin təşkilatçılığı ilə Təhsil Oyunları Platforması tərəfindən ənənəvi olaraq hər il həyata keçirilən şagirdlər arasında “Nə? Harada? Nə zaman?” oyunu üzrə respublika çempionatında iştirak ediblər.
Sumqayit24.az xəbər verir ki, iki mərhələdən ibarət olan çempionatın ilkin seçim turu onlayn formatda həyata keçirilib. Final mərhələsində Sumqayıt, Bakı, Ucar, Quba, Lənkəran, Astara, Saatlı, İsmayıllı, Goranboy, Şəki, Şirvan, Gəncə, Balakən, Ağdam, Cəbrayıl məktəblilərindən ibarət 39 komanda iştirak edib.
Finalçılara 3 tur olmaqla ümumilikdə 36 sual təqdim edilib. Final oyunun nəticələrinə əsasən, X-XI sinif şagirdləri arasından Bakı şəhəri 287 nömrəli “Zəkalar” liseyinin "Zəkalar Sr" komandası I, Şirvan şəhəri 1 nömrəli tam orta məktəbi “Moonlight” komandası II, Sumqayıt şəhəri Təbiət elmləri təmayüllü gimnaziyasının “Dahilər” komandası III yerə layiq görülüb.
Qalib komandalar kubok, medal, diplom və hədiyyələrlə təltif ediliblər.
