Sumqayıt şəhəri, Nəriman Nərimanov küçəsinin 5-ci mikrorayondan keçən hissəsində avtobus dayanacağının olmaması sakinlərin gündəlik probleminə çevrilib. Daha doğrusu, ərazidə mövcud olan dayanacaq aylar əvvəl sökülüb və indiyədək yerinə yenisi quraşdırılmayıb.
Məsələ ilə bağlı ötən ilin sentyabr ayında da məlumat paylaşmışdıq. Həmin vaxt Sumqayıt Şəhər İcra Hakimiyyəti açıqlamasında bildirmişdi ki, "aidiyyəti qurumlar tərəfindən ehtiyac olan ərazilərdə əlavə dayanacaqların quraşdırılması nəzərdə tutulur".
Aradan aylar keçib. Təqvim artıq 2026-cı ilin fevralını göstərir. Amma dayanacaq hələ də ortada yoxdur.
Bu müddət ərzində hava şəraiti dəfələrlə kəskinləşib: temperatur mənfiyə düşüb, yağış və qar yağıb. Lakin sərnişinlər üçün dəyişən heç nə olmayıb. İnsanlar soyuqda, yağışın və qarın altında, açıq havada avtobus gözləməyə məcbur qalırlar.
Yaranmış vəziyyət təkcə sərnişinlərə deyil, avtobus sürücüləri üçün də ciddi çətinlik yaradır. Dayanacaq olmadığından sərnişinlər yolun kənarında, bəzən isə hərəkət hissəsində gözləyir, bu isə həm nəqliyyatın hərəkətinə mane olur, həm də təhlükəsizlik riskini artırır.
