Azərbaycana 205 milyon 427 min dollar dəyərində 948 min 815 ton buğda idxal edilib.
Dövlət Gömrük Komitəsinin (DGK) məlumatına əsasən, bu göstərici 2023-cü ilin yanvar-oktyabr ayları ilə müqayisədə həcm baxımından 0.05% və ya 463 ton, məbləğ baxımından isə 17% və ya 41.9 milyon dollar azdır.
Qeyd edək ki, 2024-cü ilin 10 ayında ölkəyə idxal edilmiş buğdanın 1 tonunun orta qiyməti 368 manat təşkil edib.
Bəs bu ucuzlaşma çörəyin qiymətinə təsir edəcəkmi?
Suala iqtisadçı ekspert Fuad İbrahimov aydınlıq gətirib. O, bizim.media-ya açıqlamasında bildirib ki, bu statistikaya əsasən ilk ağılagələn çörəyin qiymətinin 10-15 faiz ucuzlaşmalı olduğudur:
“Bu, hələ ki, baş verməyib. Amma bu qiymət enişi hesabına çörəyin qiyməti ən azı sabit qalıb. Üstəlik, çəkiyə və keyfiyyətə də ötən müddətdə müdaxilə edilməyib. Ən azından bunu uğur hesab etmək olar.
Amma konkret hal olaraq çörəyin qiymətinin ucuzlaşacağı inandırıcı gəlmir. Çünki 2022-ci ildə dünyada buğda kəskin bahalaşdı. O cümlədən də ölkəmizdə çörəyin qiyməti artdı. Bu bahalaşmanın təsirlərini azaltmaq üçün dövlət idxal olunan ərzaqlıq buğdaya ƏDV-ni ləğv etdi.
Bundan sonra da çörəyin qiymətində 20 qəpiyə qədər ucuzlaşma oldu. İndi də ümumi bir sabitlik var. Ona görə də çörəyin ucuzlaşması və bahalaşması gözlənilmir”.
