"Bir sıra Avropa ölkələrində olduğu kimi, sürüşkən iş rejiminə keçid məsələsi ciddi şəkildə nəzərdən keçirilməlidir. Məsələn, bəzi ölkələrdə iş saatları səhər 7:00-da başlayıb, 16:00-da başa çatır. Bəzi sektorlar isə bazar günü fəaliyyət göstərməklə daha çevik vətəndaş müraciətlərini qəbul edə bilirlər. Banklar və digər xidmət sahələri bu modelə uyğunlaşdırıla bilər".
Modern.az-ın məlumatına görə, bunu Milli Məclisin bugünkü plenar iclasında deputat Fazil Mustafa bildirib.
Deputat şəhərdəki tıxac probleminə diqqət çəkib:.
"Son günlərdə yayımlanan bir reportajda bir dövlət qulluqçusu belə demişdi: "8 saat rəsmi işdə, 4 saat isə tıxacda vaxt keçirirəm." Bu təkcə fərdi narahatlıq deyil, ümumilikdə iş məhsuldarlığına və həyat keyfiyyətinə mənfi təsir göstərən ciddi problemdir. İnsanlar bəzən işə çatmaq üçün 2 saat əvvəl evdən çıxmalı, eyni müddətdə də evə qayıtmalıdır. Bu baxımdan təklif edirəm ki, əgər vətəndaşın iş yerinə çatmaq üçün yolda sərf etdiyi vaxt 2 saatı keçirsə, ona işdən 1 saat əvvəl çıxmaq imkanı verilsin. Bu yanaşma vətəndaşın işə daha enerjili gəlməsinə, keyfiyyətli xidmət göstərməsinə və ümumilikdə dövlət sektorunda məhsuldarlığın artmasına səbəb olacaq".
Fazil Mustafa tıxac probleminin birdən-birə həll edilə bilməyəcəyini sözlərinə əlavə edib:
"Amma avtobus hərəkətinin təkmilləşdirilməsi, marşrutların optimallaşdırılması və digər nəqliyyat tədbirləri ilə paralel olaraq, insanlara dəstək məqsədilə dövlət qurumlarında çalışanların vəziyyətini yüngülləşdirəcək addımlar atılmalıdır".
Qeyd edək ki, Sumqayıtdan Bakıya hər gün işə gələn sakinlər saatlarla yollarda qalırlar.
