Sumqayıt dünən 75 illik yubileyini qeyd edib. Bu münasibətlə Sumqayit24.az-ın sosial şəbəkə hesablarında növbəti dəfə sorğu keçirdik.
Budəfəki sorğumuz “Şəhərimiz ən çox hansı hədiyyəyə layiqdir?” sualından ibarət olub. Sakinlər Sumqayıtda dəyişmək istədiklərini, arzuladıqları yenilikləri dilə gətiriblər.
Belə ki, sorğuya qoşulan vətəndaşlar əhali sayına görə Azərbaycanın ikinci şəhərində böyük bir “Mall”un tikilməsini, təzə iş yerlərinin açılmasını, park və yaşıllığın artırılmasını, ailəvi piknik yerlərinin salınmasını, ənənəvi olaraq avtobusların yenilənməsini və qrafikin tənzimlənməsini, köhnə və tarixi binaların sökülməməsini, Sumqayıt Avtovağzalının yenidən qurulmasını, sahibsiz heyvanlar üçün sığınacaqların təşkil edilməsini, zibil qutularının çoxaldılmasını və izləyicilərdən birinin dediyi kimi “Sumqayıtla eyni yaşda olan baxımsız Yeni il küknarlarının” təzələnməsini diləyiblər.
