Daxili Qoşunların Xüsusi Təyinatlı Dəstəsinin şəhid giziri Emil İsgəndərovun doğum günüdür.
Şəhidimiz 5 avqust 1990-cı ildə Sumqayıtda hərbçi ailəsində anadan olub. Əslən Qubadlının Çardaxlı kəndindən idi. 2011-ci ildə Quba rayonu N saylı hərbi hissənin Daxili Qoşunların Xüsusi Vasitələrin Tətbiqi (XVT) sahəsində Müddətdən artıq hərbi xidmətə başlayıb. 2015-ci ildə gizir rütbəsi alıb.
Gizir Emil İsgəndərov Vətən müharibəsində Cəbrayıl, Hadrut və Qubadlının azadlığı uğrunda savaşıb. Qatıldığı son əməliyyat isə Şuşa şəhərində həyata keçirilib. Şəhidimiz bu döyüşlərdə qolundan iki güllə yarası alıb. Lakin silahdaşları ilə çiyin-çiyinə döyüşü sona qədər davam etdirib.
Sonra şəhər yaxınlığında yanına minaatan mərmisi düşüb və o, sol ayağından ağır yaralanıb. Döyüş yoldaşlarının köməyi ilə yaralı halda Şuşa şəhərinə aparılsa da, 7 noyabr 2020-ci ildə qanitirmədən şəhadətə ucalıb.
Ölümündən sonra "Vətən uğrunda" və "Şuşanın azad olunmasına görə" medallarına layiq görülüb.
Şəhid Emil İsgəndərov 2 azyaşlı oğlunu Vətənə əmanət edib.
