Sumqayıtda ekoloji mühitə ziyan vuran şəxslər cərimələniblər. Bu barədə 18 iyul tarixində Sumqayıt24 Daxili İşlər Nazirliyinin (DİN) mətbuat xidmətinə istinadən məlumat verir.
Şəhər ərazisində və Xəzər dənizinin sahil zolağında atmosferə atılan zərərli maddələrin zərərsizləşdirilməsi üçün tüstü bacalarına təmizləyici qurğuların quraşdırılmaması, Sumqayıt çayına tullantı sularının axıdılması, həmçinin məişət və istehsalat tullantılarının çayın kənarında qalaqlanması faktları aşkar olunub.
Atmosferə atılan zərərli maddələrin zərərsizləşdirilməsi üçün tüstü bacalarına təmizləyici qurğuların quraşdırılmamasına görə istirahət mərkəzlərinin icarədarı barəsində İnzibati Xətalar Məcəlləsinin 237.1-ci, Sumqayıt çayına tullantı sularının axıdılmasına, həmçinin məişət və istehsalat tullantılarının çayın kənarında qalaqlanmasına görə isə bir vəzifəli şəxs barəsində İnzibati Xətalar Məcəlləsinin 264.0.1-ci və 271-ci maddələri ilə inzibati tənbeh tədbiri tətbiq olunub.
