H.Z. Tağıyev qəsəbəsində 7 nəfərin 16 yaşlı qızı zorlamasına münasibət bildirilib. Sumqayıt24 bu haqda 17 avqust tarixində Oxu.az-a istinadən xəbər verir.
Ailə, Qadın və Uşaq Problemləri üzrə Dövlət Komitəsinin mətbuat katibi Teymur Mərdanoğlunun sözlərinə görə, məlumat quruma daxil olan kimi müvafiq dövlət qurumları ilə əlaqə saxlanılıb:
“Dərhal araşdırmaya başlanılıb. Sumqayıt Şəhər İcra Hakimiyyəti yanında Yetkinlik yaşına çatmayanların işləri və hüquqlarının müdafiəsi üzrə komissiyanın əməkdaşları psixoloqla birlikdə yeniyetmə qız və anası ilə görüş keçirəcəklər”.
O qeyd edib ki, hadisə ilə bağlı cinayət işi başlanıb:
“Artıq bir nəfər həbs olunub və zəruri istintaq araşdırmaları davam etdirilir”.
Xatırladaq ki, 19 yaşlı Bibiqulu Xosrov oğlu Abbasov qızın 15 yaşı olan zaman onunla tanış olub və zorlayıb. Daha sonra qızı hər şeyi atasına deməklə şantaj edib və dostları ilə birlikdə davamlı zorlayıb.
Sumqayıt Şəhər Polis İdarəsinin İstintaq Şöbəsində Cinayət Məcəlləsinin 152.1 (On dörd yaşına çatmış, lakin on altı yaşına çatmayan şəxslə cinsi əlaqədə olma və ya seksual xarakterli digər hərəkətlər etmə) maddəsi ilə cinayət işi başlanılıb. Hadisədə iştirak edən şəxslər istintaqa cəlb ediliblər.
