Sumqayıtda ötən tədris ilində 3789 nəfər 11-ci sinfi bitirib. Sumqayıt24 bu haqda 14 sentyabr tarixində xəbər verir.
Onlardan 157 nəfər fərqlənmə attestatına, 19 nəfər isə təhsildə xüsusi nailiyyətlərinə görə qızıl və gümüş nişanlara layiq görülüblər. Bundan yüksək bal toplayan məzunlarla keçirilən görüşdə bəhs olunub.
Tədbirdə Sumqayıt şəhər İcra Hakimiyyətinin başçısı Zakir Fərəcov, Abşeron-Xızı Regional Təhsil İdarəsinin müdiri İlhamə Abdullayeva, millət vəkili Müşfiq Məmmədli, təhsil işçiləri, şəhid övladları və bu il tələbə qəbulunda yüksək bal toplayan məzunlar iştirak ediblər.
Çıxışçılar bildiriblər ki, 3015 məzun ali təhsil müəssisələrinə sənəd verib, onlardan 2448-i tələbə adını qazanıb. Bununla da şəhər üzrə universitetlərə qəbul faizi 81-ə barabər olub.
Onu da qeyd edək ki, qəbul imtahanında iştirak edən məzunlarımızdan 130 nəfəri 600-dən yuxarı, onlardan 26 nəfəri isə 650-dən yuxarı bal toplayıb.
Məktəblər üzrə 650-dən yuxarı bal toplayanlar arasında ilk 3 yeri 11 nəfərlə Təbiət elmləri təmayüllü gimnaziya, digər yerləri isə 2 nəfərlə Təfəkkür liseyi və 30 nömrəli məktəb tutur.
600-dən yuxarı bal toplayanlar arasında isə ilk yerdə 31 nəfərlə yenə Təbiət elmləri təmayüllü gimnaziya, digər yerlərdə isə 8 nəfərlə Texniki və təbiət elmləri liseyi, 35 və 11 nömrəli məktəblər yerləşir.
Bundan əlavə, ötən tədris ilində şagirdlərimiz Respublika Fənn Olimpiadalarında da yüksək nəticələr göstəriblər. Sumqayıt şəhəri üzrə 40 şagird olimpiada qalibi olub. Onlardan 8 nəfər qızıl, 16 nəfər gümüş, 16 nəfər isə bürünc medalla mükafatlandırılıblar. Olimpiada qalibi olan gənclərin 23-ü Təbiət elmləri təmayüllü gimnaziyanın, 7 nəfəri isə 23 nömrəli məktəbin şagirdləridir.
Həmçinin “Sabahın alimləri” müsabiqəsində məktəblərimizin 6 layihəsi medala layiq görülüb. Onlardan İstedad liseyi 1 qızıl medal, Təbiət elmləri təmayüllü gimnaziya 1 gümüş, 1 bürünc medal, Texniki və təbiət elmləri liseyi və TET gimnaziya birlikdə 1 gümüş medal, 1 nömrəli məktəb 1 gümüş medal, 14 nömrəli məktəb isə 1 bürünc medal qazanıb.
Elm və Təhsil Nazirliyinin ulu öndər Heydər Əliyevin 100 illiyinə həsr etdiyi “Ən yaxşı təqdimat” müsabiqəsinin finalında Sumqayıtın iki şagirdi 1-ci yerə layiq görülüb. Onlar Təbiət elmləri təmayüllü gimnaziya və 26 nömrəli məktəbin şagirdləridir.
Şagirdlərimiz, həmçinin müxtəlif istiqamətli tədbir, incəsənət idman və intellektual yarışlarda iştirak edərək “Xəmsə Milli İntellektual Oyunu”, “Fövqəladə hallar uşaqların gözü ilə” X respublika uşaq yaradıcılıq müsabiqəsi, “Xəmsə möcüzəsi” I Respublika onlayn incəsənət festival-müsabiqəsi, “Əlaçı” televiziya layihəsində bir sıra nailiyyətlər əldə ediblər.
Təhsildə inkişaf və innovasiyalar üzrə VII qrant müsabiqəsi çərçivəsində isə şəhər üzrə 7 layihə qalib olub.
Görüşün sonunda yüksək bal toplayan məzunlar mükafatlandırılıblar.
