Sumqayıtda havanın çirklənmə səbəbləri sadalanıb. Sumqayıt24 bu haqda 16 noyabr tarixində Bizim.media-ya istinadən xəbər verir.
Tibb elmləri doktoru Adil Qeybulla mövzu ilə bağlı danışıb:
“Bütün dünyada atmosfer havasının çirklənməsinin dərəcələri həmin havada toplanmış zərərli maddələrlə, o cümlədən polisiklik aromatik hidrokarbonlarla (PAHlar) ölçülür.
Sumqayıtda isə sözügedən problemi zavodlar yaradır. Sumqayıt sovet dövründən etibarən çirkli şəhər sayılırdı. Burada azot-4 oksidinin miqdarı Bakıdan da çoxdur. Bu məsələlərin həlli üçün ilk növbədə avtomobillərin sayı azaldılmalıdır.
Müəyyən ekoloji təmizləmə işləri görülməlidir. Bütün dünyada zavodlar var. Yaxşı olar ki, bu zavodlar şəhərdən kənarda tikilsin və həmin zavodların tullantılarının zərərsizləşdirilməsi həyata keçirilsin”.
Professor sözügedən maddələrin insan sağlamlığına mənfi təsirlərindən də söz açıb:
“Dəm qazı və azot-4 oksidi toksik maddələrdir. Bu maddələr orqanizmdə halsızlığa, zəifliyə və ümumi yorğunluğa gətirib çıxarır. Sərbəst radikallar gen mutasiyalarına və xərçəng şişinin inkişafına gətirib çıxara bilər. Bu maddələr insanlarda ağciyər və digər orqanların xərçəngini yaradır”.
