Bu gün Vətən müharibəsi iştirakçısı Xaliq İbrahimovun doğum günüdür.
Xaliq Arif oğlu İbrahimov 1985-ci ildə Sumqayıt şəhərində anadan olub. Orta təhsilini 36 saylı tam orta məktəbdə alıb. Daha sonra o, təhsilini Heydər Əliyev adına Azərbaycan Ali Hərbi Məktəbində davam etdirib. Təhsilini bitirdikdən sonra leytenant hərbi rütbəsində Azərbaycan Silahlı Qüvvələrinin sıralarında xidmətə başlayıb.
Polkovnik-leytenant İbrahimov 2020-ci ildə başlayan İkinci Qarabağ müharibəsində Cəbrayıl, Füzuli, Xocavənd və Qubadlının azad edilməsində böyük qəhrəmanlıq göstərib.
Bu şərəfli xidmətlərinə görə prezident İlham Əliyevin Sərəncamı ilə "Vətən Müharibəsi Qəhrəmanı" medalı ilə təltif olunub.
Müharibədən sonra İbrahimov Xüsusi Təyinatlı Qüvvələrdən Hərbi Dəniz Qüvvələrinə keçərək I dərəcəli kapitan kimi xidmətinə davam edir. Prezident İlham Əliyevin 2 fevral 2024-cü il tarixli Sərəncamı ilə "Heydər Əliyevin 100 illiyi" yubiley medalı ilə də təltif edilib.
