Şəhidimiz Vüsal Allahverdiyevin mövlududur. O, 16 avqust 1988-ci ildə Qubadlı rayonunda anadan olub.
31 avqust 1993-cü ildə Qubadlının ermənilər tərəfindən işğalından sonra Vüsal ailəsi ilə birgə məcburi Sumqayıt şəhərinə köçüb. Orta təhsilini 23 nömrəli və Qubadlı rayon 2 saylı məktəblərdə alıb. Sonra, 2006-2010-cu illərdə Azərbaycan Kooperasiya Universitetinin Maliyyə və kredit fakültəsində oxuyub. 2012-2015-ci illərdə "Unibank" Kommersiya Bankında istehlak krediti üzrə aparıcı mütəxəssis vəzifəsində çalışıb. Ardınca 4 aya yaxın “Sumqayıt şəhər Təmizlik Departamenti” MMC-də mühasib köməkçisi, sonra isə “Kontakt Home” mağazalar şəbəkəsində kredit mütəxəssisi kimi işləyib. Nəzərdə tutulan imtahandan yüksək balla keçən Allahverdiyev 2020-ci ildən “Kapital Bank”da "Birkart Bank olmayan Kredit Təşkilatı" MMC-nin 20 saylı filialının müdiri təyin olunub.
Vətən müharibəsində Vüsal Füzulinin, Cəbrayılın, Xocavəndin azadlığı uğrunda və Füzuli rayonunun Seyidəhmədli kəndi istiqamətində gedən döyüşlərdə iştirak edib. 30 oktyabr 2020-ci ildə Xocavənd istiqamətində döyüş tapşırığını yerinə yetirərkən qəhrəmancasına şəhid olub. O, Sumqayıt Şəhidlər xiyabanında dəfn olunub.
Vüsal Allahverdiyev ölümündən sonra “Vətən uğrunda”, “Döyüşdə fərqlənməyə görə” və “Füzulinin azad olunmasına görə” medallarına layiq görülüb.
Şəhidimizə məxsus materiallar ailəsi tərəfindən Milli Azərbaycan Tarixi Muzeyinin Vətən müharibəsi fonduna təhvil verilib.
