Sumqayıtda tanınmış jurnalist Cəmil Məmmədlinin məhkəməsi olacaq. Sumqayıt24 bu haqda 17 avqust tarixində Bakupost.az-a istinadən xəbər verir.
Cinayət işi üzrə məhkəmə prosesi Sumqayıt Ağır Cinayətlər Məhkəməsində hakim Fəhmin Hümbətovun sədrliyi ilə keçiriləcək.
Qeyd edək ki, Cəmil Məmmədli ötən il dekabrın 15-də Xaçmaz rayon sakini C. Ağabalayevlə münaqişə edərək söyməkdə, zor tətbiq etmək hədəsi ilə cəmiyyətə açıqca hörmətsizlik ifadə etməkdə, ona əl-ayaqla xəsarətlər yetirmək və anasının bədən nahiyəsinə zərbələr endirməklə xuliqanlıq əməli törətməkdə ittiham edilir.
Ona qarşı Cinayət Məcəlləsinin 178.2.4 (dələduzluq, xeyli miqdarda ziyan vurmaqla törədildikdə), 182.2.1 (hədə-qorxu ilə tələb etmə, qabaqcadan əlbir olan bir qrup şəxs tərəfindən törədildikdə), 182.2.2 (təkrar hədə-qorxu ilə tələb etmə) və 221.2.2-ci (xuliqanlıq) maddələri ilə ittiham irəli sürülüb.
Məlumata görə, jurnalist bu ittihamları rədd edir. Ötən gün o, ittiham aktında adları qeyd olunan və guya pul tələb etdiyi şəxslərin sosial şəbəkələrdə səs yazısını yayıb. Burada onlar istintaqda Cəmil Məmmədlinin onlardan pul tələb etdiyi barədə ifadə vermədiklərini bildirirlər.
Qeyd edək ki, məhkəmə bu gün saat 10:00-da başlayacaq.
