Saray körpüsünün qarşısında çökən yol təmir edilib.
Baku.ws xəbər verir ki, ərazidə təmir-bərpa işləri bu gecə həyata keçirilib.
Məsələ ilə bağlı Azərbaycan Avtomobil Yolları Dövlət Agentliyinin (AAYDA) mətbuat katibi Anar Nəcəfli bildirib ki, Saray körpüsünün tikintisi zamanı Agentlik tərəfindən yanaşma yollarda hər hansı bərpa aparılmayıb. Burada, müəyyən hissələrdə çökmələr, çatlar və nahamarlıqlar var:
"Bir neçə gündür Saray körpüsündə çökmə olması ilə bağlı söz-söhbət yayılıb. Əslində Saray körpüsündə hər hansı problem yoxdur. Oradakı yanaşma yollarında problem var. Saray körpüsünün tikintisi zamanı tərəfimizdən yanaşma yollarda hər hansı bərpa aparılmayıb.
Burada müəyyən hissələrdə çökmələr, çatlar və nahamarlıqlar var. O yolun yenidənqurulması ilə bağlı təkliflər hazırlamışıq. Körpüyə uyğun 4 hərəkət zolağı qorunmaqla yenidən qurulmasının təklifini hazırlayıb aidiyyatı üzrə yönəltmişik. Yəqin ki müsbət nəticəsi olar. Dünən isə yanaşma yolda söz-söhbətə səbəb olan çökən hissəyə yamaq vurulub", - deyə A. Nəcəfli vurğulayıb.
Qeyd edək ki, Sumqayıt şəhərini Abşeron rayonunun Saray qəsəbəsi ilə birləşdirən körpü bu ilin martın 18-də istifadəyə verilib. Sözügedən körpünün tikintisinə 2024-cü ilin dekabr ayında başlanıb. 3 aşırımdan ibarət olan körpü, 4 hərəkət zolağından ibarətdir. Körpü 104 metr uzunluğunda və 21,6 metr enində inşa olunub. Həmçinin, körpünün sağ və sol hissələrində piyada səkiləri də tikilib.
Körpü 4 dayaq üzərində inşa edilib və orta dayaqlarda 1,5 metr diametrli 6 sütun yerləşir. Ümumilikdə körpü 12 sütundan ibarət olub, hər dayaq iki cərgəli svaylar üzərində qurulub. Svayların uzunluğu 14 metr, diametri isə 1 metrdir və ümumilikdə 80 svaydan istifadə olunub.
