76-cı məhəllə su altında qalıb. Sumqayıt24 bu haqda 30 noyabr tarixində xəbər verir.
İnsanlar, hətta evdən çölə çıxmağa çətinlik çəkirlər. Onların sözlərinə görə, buradan keçən kanalizasiya axıntıları uzun müddətdir ki, problemlər yaradır. Ərazini üfunət bürüyüb. Müxtəlif xəstəliklərin yaranma riski var.
Sumqayıt Sukanal İdarəsinin rəisi Xalid Quliyev Xeberle.com-a bildirib ki, ərazidə idarəyə məxsus heç bir kanalizasiya şəbəkəsi yoxdur. Buna baxmayaraq, vətəndaşların müraciəti əsasında əraziyə texnika veriləcək və insanlara köməklik göstəriləcək:
"Əvvəlcə onu deyim ki, bizim orada heç bir kanalizasiya şəbəkəmiz yoxdur. "Acı dərə” açıq kanaldır və biz ora xidmət göstərmirik. Buna baxmayaraq, məlumat daxil olan kimi biz yerində baxış keçirmişik. Məlum olub ki, maşın bazarının arxasında olan tikinti şirkəti tərəfindən orada olan göl beton borular vasitəsilə "Acı dərə” kanalına istiqamətləndirilib. Nəticədə də kanal daşıb. Bu da əhalinin narazılığına səbəb olub. Bizim əməkdaşlar şirkətin nümayəndələri ilə görüşüblər. Bildirilib ki, su kanala axıdılmasın”.
Qurumun baş mühəndisi Mahir İmanov isə açıqlamasında deyib ki, "Acı dərə”də suyun səviyyəsinin artması nəticəsində bir neçə sakinin evə gediş-gəlişində problem yaranıb.
