Sumqayıtda qayınatasını qətlə yetirməkdə təqsirləndirilən Nurulla Mərdanovun cinayət işi üzrə məhkəmə prosesi yekunlaşıb.
Oxu.az-ın məlumatına görə, 1998-ci il təvəllüdlü Nuralla Mərdanov Sumqayıtda, restoranların birində kababçı işləyib.
Ötən ilin iyun ayında Nurulla ilə həyat yoldaşı arasında qısqanclıq zəminində mübahisə baş verib. Nurulla Mərdanov həyat yoldaşını amansızlıqla döyərək ona xəsarət yetirib və evi tərk edib. Hadisədən xəbər tutan qızın atası vəziyyəti aydınlaşdırmaq məqsədilə onlara gəlsə də, Nurullanı evdə tapa bilməyib. O, kürəkəninə zəng vuraraq görüşüb danışmaq istədiyini bildirib.
Sumqayıtda küçədə baş tutan görüş zamanı qayınata ilə kürəkən arasında mübahisə baş verib və Nurulla Mərdanov qayınatası Arif Bağıyevi bıçaqla qətlə yetirib.
Polis əməkdaşlarının həyata keçirdikləri əməliyyat nəticəsində Nurulla Mərdanov saxlanılaraq istintaqa təhvil verilib.
Sumqayıt Ağır Cinayətlər Məhkəməsində keçirilən prosesdə təqsirləndirilən şəxsə hökm elan olunub. Məhkəmənin qərarı ilə Nurulla Mərdanov 16 il müddətinə azadlıqdan məhrum edilib.
