Bakı–Sumqayıt yolundakı sıxlığın səbəbi açıqlanıb. Sumqayıt24 bu haqda 20 aprel tarixində xəbər verir.
Azərbaycan Avtomobil Yolları Dövlət Agentliyindən (AAYDA) bildirilib ki, təmir işləri Bakı Beynəlxalq Avtovağzal Kompleksindən Bakı Dairəvi avtomobil yoluna çıxış olan hissədə (estakadadan YDM-dək) aparılır.
Ərazidə köhnə asfalt-beton örtüyünün üst qatının frezlənərək kənarlaşdırılması işləri icra olunur. Buna görə həmin hissədə hərəkət qismən məhdudlaşdırılıb:
“Sürücülərdən bu gün ərzində qeyd olunan ərazidə hərəkətdə olarkən diqqətli olmaları, müvəqqəti yol nişanlarının tələblərinə və yol hərəkəti qaydalarına riayət etmələri xahiş olunur”.
Qeyd olunub ki, sabah yola yeni asfalt-beton örtüyünün döşənməsinə başlanılacaq. Bu səbəbdən yolun sözügedən hissəsində hərəkət tam dayandırılacaq.
Sürücülər Sumqayıt yolundan birbaşa Bakı Dairəvi avtomobil yoluna daxil olub hərəkətlərinə davam edə bilərlər.
Asfaltlanma işlərindən sonra yola üfüqi nişanlanma xətləri çəkiləcək.
Təmir işlərinin 21 aprel saat 22:00-dək yekunlaşdırılması planlaşdırılır. Bunun üçün əraziyə lazımi sayda canlı qüvvə və texnika cəlb edilib.
