Bakı-Sumqayıt yolunda sərnişini döyən taksi sürücüsü amnistiya ilə azad olunub.
Pravda.az-ın məlumatına görə, Zahid Xəlilzadə 2025-ci ildə taksi fəaliyyəti ilə məşğul olarkən Sumqayıtdan sərnişin götürərək Bakı istiqamətində hərəkət edib. Xırdalan ərazisində, Masazır dairəsi istiqamətində köməkçi yolla hərəkət edərkən qabaq oturacaqda əyləşən sərnişin Fərəc Babayev (adı şərtidir) buna etiraz edib. Sürücünün kobud davranışı səbəbindən tərəflər arasında mübahisə yaranıb. Daha sonra sürücü avtomobili saxlayaraq sərnişini düşürüb və ona yumruq-təpiklə zərbələr endirərək fiziki zor tətbiq edib.
Hadisə nəticəsində zərərçəkmiş şəxsə burun nahiyəsinin və sağ əlin 5-ci barmağının sıyrıqları, sağ dirsək oynağı nahiyəsinin və sağ əlin qançırları, alt dodağın əzilmiş yarası, eləcə də xaya nahiyəsinin hematoması kimi xəsarətlər yetirilib.
Beləliklə, təqsirləndirilən şəxs Cinayət Məcəlləsinin 128-ci (qəsdən sağlamlığa yüngül zərər vurma) maddəsi ilə nəzərdə tutulmuş cinayət əməlini törətməkdə ittiham olunub və o, özünü təqsirli bildiyini bəyan edib.
Qeyd edək ki, məhkəmənin hökmü ilə "Konstitusiya və Suverenlik İli" münasibətilə amnistiya elan edilməsi haqqında Milli Məclisin 19 dekabr 2025-ci il tarixli Qərarının 5.1-ci maddəsi tətbiq edilməklə təqsirləndirilən şəxs Cinayət Məcəlləsinin 128-ci maddəsi ilə cinayət məsuliyyətindən azad edilib və iş üzrə icraata xitam verilib. Onun barəsində seçilmiş başqa yerə getməmək barədə iltizam qətimkan tədbiri ləğv olunub.
