Ceyranbatan qəsəbəsinin Təbrik məhəlləsində antisanitariya vəziyyəti hökm sürür. Sumqayıt24 bu haqda 21 iyun tarixində Qaynarinfo.az-a istinadən xəbər verir.
Məhəllədə zibil aşıb-daşır. Müvafiq qurumlar isə heç bir tədbir görmür. Sakinlərin sözlərinə görə, son il yarım ərzində Ceyranbatanda zibil məsələsi ciddi problemə çevrilib:
“Demək olar ki, zibilxanalar günlərlə, hətta bəzən 10 gün ərzində təmizlənmir. Aşıb-daşan zibil qutuları boşları ilə əvəzlənmir”.
Məsələ ilə bağlı Ceyranbatan qəsəbəsinin icra nümayəndəliyinə və bələdiyyəyə müraciət edilsə də, nəticəsi yoxdur:
"Onlar məsuliyyəti Mənzil-Kommunal Təsərrüfat Birliyinin üzərinə atırlar. Guya zibillərin günlərlə yığılmaması maşın çatışmazlığı və ya maşınların nasaz olması ilə əlaqədardır. Problem dəfələrlə müxtəlif media orqanlarında işıqlandırılsa da, nəticəsi olmayıb. Hamısı “ötür-ötür” oyunu oynayır. Nəticədə sakinlər əziyyət çəkirlər. Zibillərin vaxtında yığışdırılmaması antisanitariyaya səbəb olub. Yayda ərazidə üfunətdən dayanmaq olmur. Zibillikdə qidalanan küçə itləri uşaqlara, qadınlara böyük təhlükə yaradır. Düzdür, indi məktəblər bağlanıb, amma dərs vaxtlarında uşaqlar təkbaşına həmin ərazidən keçərək məktəbə getməkdən qorxurlar”.
