Corat qəsəbəsində yolların vəziyyəti uzun müddətdir ki, sakinlər arasında ciddi narazılıq yaradıb.
Sumqayit24.az-a daxil olan məlumata görə, Nəriman Nərimanov küçəsində yolun yararsız vəziyyətdə olması vətəndaşların gündəlik həyatını xeyli çətinləşdirir.
Yerli sakinlərin məlumatına əsasən, bu problemlə bağlı dəfələrlə aidiyyəti qurumlara müraciət etsələr də, məsələ ilə bağlı hər hansı tədbir görülməyib.
"Yağışlı havalarda küçələr tamamilə keçilməz hala düşür. Palçıq səbəbindən həm piyadaların, həm də nəqliyyat vasitələrinin hərəkətində problemlər yaranır. Yay aylarında isə vəziyyət fərqli formada özünü göstərir. Belə ki, asfalt örtüyü olmadığından toz-torpaq qalxır, bu da həm yaşayış şəraitinə, həm də insanların sağlamlığına mənfi təsir edir", - deyə şikayətçilər qeyd ediblər.
Bir sözlə, vətəndaşlar müvafiq qurumlardan əraziyə baxış keçirilməsini və problemin tezliklə aradan qaldırılmasını tələb edirlər.
