Sumqayıt şəhəri, 17-ci mikrorayonda hasara alınmış böyük ərazi zibil poliqonuna çevrilib.
Bu barədə Sumqayit24.az-a yerli sakinlər müraciət ediblər.
Şikayətçilərin sözlərinə görə, ərazidə illərdir yarımçıq tikili var. Deyilənə görə, burada nə vaxtsa bağça tikiləcək. Şəhər ərazisindən yığılan zibil buraya gətirilir və hər 2-3 gündən bir yandırılır.
“Mikrorayonda həm əhali sayı çoxdur, həm də yaxınlığında 4 nömrəli məktəb və Sumqayıt Olimpiya İdman Kompleksi yerləşir. Uşaqlar hər dəfə buradan keçəndə zəhər udurlar, mən hələ sakinləri demirəm. Kimin atılan əşyaları varsa, gətirib bura tökürlər və yandırırlar. Tullantılar dayanmadan 5-6 saat yandırılır. Pəncərəni açmaq mümkün olmur, ətrafı qara tüstü bürüyür. Bir dəfə güclü yanğın da olub. Aidiyyəti quruma şikayət olunub, gəlib bir maşın zibil aparıblar. Sonra vəziyyət yenə də təkrarlanıb. Zibil utilizasiyası şəhərdən kənar, insanların yaşadığı ərazidən uzaq yerdə olmalıdır.”
