Bu gün Sumqayıtda yaşamış şəhidimizin doğum günüdür.
Ramil Elşən oğlu Quliyev 1991-ci ilin fevral ayının 18-də Qubadlı rayonunda anadan olub. 1997-ci ildə Sumqayıt şəhər 14 nömrəli tam orta məktəbin 1-ci sinfinə daxil olub. 2000-ci ildən təhsilini Sumqayıt şəhər 35 saylı tam orta məktəbində davam etdirib və 2008-ci ildə həmin məktəbin məzunu olub. Ali təhsilini Ukraynada alıb.
2015-ci ilin iyul ayında hərbi xidmətə gedib və hərbi xidmətdə baş atıcı olub. Lələtəpə uğrunda gedən döyüşlərdə iştirak edib və 2016-cı ilin iyul ayında hərbi xidmətini bitirib.
44 günlük Vətən müharibəsində könüllü iştirak edib.
Əsgər yoldaşlarının sözlərinə görə, Ramil müharibədə verilən tapşırıqları uğurla yerinə yetirib. Hadrut uğrunda gedən döyüşlərdə verilən tapşırığı yerinə yetirərkən düşmənin snayper gülləsi ilə vurulub və qəhrəmancasına şəhid olub. Oktyabr ayının 22-si Sumqayıtda, Şəhidlər xiyabanında dəfn olunub.
Prezident İlham Əliyevin Sərəncamlarına əsasən, Ramil Quliyev ölümündən sonra "Füzulinin azad olunmasına görə", "Cəbrayılın azad olunmasına görə", "Vətən uğrunda" və "İgidliyə görə" medalları ilə təltif olunub.
