Novxanı sakinləri kanalizasiya problemi yaşayırlar. Sumqayıt24 bu haqda 15 avqust tarixində xəbər verir.
V. Axundov küçəsinin sakinləri bildiriblər ki, ərazidə kanalizasiya xətti yoxdur və onlar şambo sistemindən istifadə edirlər. Əvvəl şambodan çirkab suları çəkmək mümkün olurdusa, son illərdə bu mümkünsüz olub.
İnsanların sözlərinə görə, kanalizasiya suları yaşayış evlərinin altına dolur. Problemin həlli ilə bağlı aidiyyəti qurumlara müraciət ünvanlansa da, hər hansı cavab alınmayıb.
“Azərsu” ASC məsələ ilə əlaqədar Qafqazinfo.az-a açıqlama verib. Bildirilib ki, qəsəbədə mərkəzləşdirilmiş kanalizasiya sistemi mövcud olmadığından qurum həmin ərazidə tullantı sularının axıdılması xidmətlərini göstərmir:
“Həmin ərazilərdə kanalizasiya şəbəkəsinin yaradılması üçün ilk növbədə daşıyıcı kollektorlar inşa edilməlidir. Sonra tikiləcək şəbəkələr həmin kollektorlara qoşulmalıdır. Bununla bağlı layihələr hazırlanıb. Abşeron yarımadasının qəsəbələrində mərhələlərlə kanalizasiya layihələri icra olunur”.
