Saray qəsəbəsində yaşayış evlərinin həyətlərinə çirkab dolub. Bu haqda 7 mart tarixində Sumqayıt24 Xezerxeber.az-a istinadən məlumat verir.
Bu hal kanalizasiya sularının axdığı gölün daşması nəticəsində yaranıb. Sakinlər bildirirlər ki, ərazidə təqribən 500-dən çox ev var. Bunlardan 50-sinin həyətinə çirkab dolub. Sular, həmçinin avtomobil yolunu da tutub.
Məsələ ilə bağlı Bağlar Su Kanal İdarəsindən bildirilib ki, ərazi onlara aid olsa da, həmin ünvandan ödənişlər olmadığına görə heç bir xidmət aparılmır.
Abşeron Rayon İcra Hakimiyyətinin qəsəbə üzrə icra nümayəndəliyindən isə qeyd olunub ki, həmin gölə elə sakinlərin özləri tərəfindən kanalizasiya suları axıdılır. Bu səbəbdən göldə suyun səviyyəsi tez-tez qalxır. Buna baxmayaraq, göl 70 metr uzunluğunda borularla kanalizasiya şəbəkəsinə qoşulub və mütəmadi olaraq, nəzarətdə saxlanılır.
