Sumqayıtda bəzi avtobusların yol hərəkəti qaydalarına əməl etməməsi ciddi narazılıq yaradıb.
Sumqayit24.az xəbər verir ki, bir sürücü sosial şəbəkələrdə bununla bağlı videogörüntü paylaşıb.
Sürücü qeyd edib ki, 7 nömrəli marşrut xətti üzrə hərəkət edən avtobusların yol zolaqlarının tələbinə əməl etməməsi yolun daralmasına, eləcə də digər nəqliyyat vasitələrinin hərəkətində çətinliklərin yaranmasına səbəb olur.
Azərbaycan Yerüstü Nəqliyyat Agentliyinin mətbuat katibi Tural Orucov Sumqayit24.az-a bildirib ki, məsələ ilə bağlı daşıyıcıya xəbərdarlıq edilib.
"Daşıyıcıya xəttin nizamlı fəaliyyətini təmin etmək, səlahiyyətində olan sürücülərin sərnişindaşıma qaydalarına ciddi riayət etmələri, sərnişinlərin mindirib-düşürmələrini yalnız təyin edilən dayanacaq məntəqələrində həyata keçirmələri ilə bağlı tapşırıq verilib", - deyə Tural Orucov qeyd edib.
