Sumqayıtda 1980-ci il təvəllüdlü İntiqam (adlar şərtidir) ögey oğlu Alimə xəsarət yetirib.
Demokrat.az-ın məlumatına görə, hadisə 9-cu mikrorayonda, 71 saylı binanın həyətində baş verib. Şəxsi münasibətlər zəminində yaranan mübahisə zamanı İntiqam Alimin sifət nahiyəsinə bir neçə dəfə yumruq vurub.
İntiqam barəsində Cinayət Məcəlləsinin 128-ci (qəsdən sağlamlığa zərər vurma) maddəsi ilə ittiham irəli sürülüb. O, məhkəmədə özünü təqsirli bilib və bildirib ki, Alim ikinci həyat yoldaşı Fəridənin oğludur, onu 9 yaşından böyüdüb. Onlar 2025-ci ilin yanvar ayından rəsmi olaraq boşanıblar.
Onun sözlərinə görə, hadisə günü sərxoş halda gecə saatlarında keçmiş həyat yoldaşının yaşadığı evə gedib. Qapını açan olmadığı üçün həyətə düşüb. Bu zaman Alim gəlib və aralarında mübahisə yaranıb. Nəticədə İntiqam əsəbiləşərək ona zərbələr endirib.
Zərərçəkmiş Alim isə bildirib ki, anasının zəngi ilə həyətə düşüb və sərxoş halda olan atalığı ilə mübahisə zamanı sifət nahiyəsindən xəsarət alıb, burnu qanayıb.
Bu cinayət işinə Sumqayıt Şəhər Məhkəməsində baxılıb. Məhkəmədə məlum olub ki, təqsirləndirilən şəxs zərərçəkənlə barışıq əldə edib. Zərərçəkən də ona qarşı şikayətçi olmadığını deyib. Bu səbəbdən də təqsirləndirilən şəxsin barəsində olan cinayət təqibinə xitam verilib. O, cinayət məsuliyyətindən azad edilib.
