Sumqayıtda iki bacı arasında mübahisə cinayət işi ilə nəticələnib.
Demokrat.az-ın məlumatına görə, 1988-ci il təvəllüdlü Süsən (ad şərtidir) bacısı İnarə ilə onun evə gəlməməsi və xəbər verməməsi səbəbindən mübahisə edib. Daha sonra əsəbiləşərək stolun üstündəki stəkanla bacısının başına bir dəfə zərbə vurub.
Süsən barəsində Cinayət Məcəlləsinin 128-ci (qəsdən sağlamlığa zərər vurma) maddəsi ilə ittiham irəli sürülüb. O, məhkəmədə təqsirini etiraf edərək bacısının yaxşılığını istədiyini, narahat olduğu üçün bu addımı atdığını və peşman olduğunu bildirib.
Zərərçəkmiş İnarə isə sevdiyi şəxslə qaldığı üçün evə gəlmədiyini və xəbər vermədiyini deyib. Onun sözlərinə görə, mübahisə zamanı bacısı başına stəkanla vurub, bundan sonra 102-yə məlumat verib. Daha sonra tərəflər barışıb, dəymiş ziyan ödənilib və İnarə şikayətçi olmadığını bildirib.
Sumqayıt Şəhər Məhkəməsi barışmanı nəzərə alaraq Süsən barəsində cinayət təqibinə xitam verib və onu cinayət məsuliyyətindən azad edib.
