Sumqayıtda kişi tibbi müayinə zamanı qəfil vəfat edib.
Sumqayit24.az-a daxil olan məlumata görə, 1 nömrəli Şəhər Xəstəxanasında Kompüter tomoqrafiyası (KT) zamanı pasiyentin qəfil halı pisləşib və nəticədə ölüm faktı qeydə alınıb.
Sumqayıt Tibb Mərkəzindən Sumqayit24.az-a bildirilib ki, 29.01.2026-cı il tarixində saat 14:00 radələrində 1956-cı il təvəllüdlü şəxs (kişi) qeyri-stabil proqressivləşən gərginlik stenokardiyası, postinfarkt, kardioskleroz, durğunluq ürək çatışmazlığı və sidik kisəsinin törəməsi diaqnozları ilə Sumqayıt Tibb Mərkəzinin tabeliyində fəaliyyət göstərən 1 nömrəli Şəhər Xəstəxanasının Kardiologiya şöbəsinə hospitalizasiya olunub.
"Pasiyent mövcud klinik vəziyyətinə uyğun olaraq bütün zəruri və müvafiq tibbi xidmətlər göstərilib. Makrohematuriya müşahidə edildiyinə görə kompüter tomoqrafiyası (KT) müayinəsinin aparılmasına tibbi göstəriş yaranıb.
Xəstənin kompüter tomoqrafiyası (KT) müayinəsi zamanı ümumi vəziyyəti qəfil pisləşib. Həkimlər tərəfindən dərhal reanimasiya tədbirləri görülsə də, onun həyatını xilas etmək mümkün olmayıb və 30.01.2026-cı il tarixində saat 15:00 radələrində ölüm faktı qeydə alınıb.
İlkin tibbi rəyə əsasən onun ölümünün səbəbi tromboemboliya kimi qiymətləndirilir.
Qeyd edək ki, ölümün bilavasitə səbəbi yalnız meyitin patoloji-anatomik müayinəsi nəticəsində təyin olunur", - deyə qurumdan bildirilib.
