Sumqayıtda yerləşən avtoyuma məntəqələrində içməli sudan istifadə israfçılığa gətirib çıxarır. Sumqayıt24 bu haqda 25 noyabr tarixində Azertag.az-a istinadən xəbər verir.
Xəzər Universitetinin Coğrafiya və ətraf mühit departamentinin müdiri, su üzrə mütəxəssis Rövşən Abbasovun sözlərinə görə, avtoyuma məntəqələri suyun ödənişini edirlər:
“Amma bir şeyin ödənişini edib onu israf etmək heç də həmin məsələyə haqq qazandırmır. Ümumiyyətlə, avtomobilin yuyulmasında 150-200 litrə qədər su istifadə edilir. Bu tip yumalar zamanı suyun təxminən 50%-ə qədəri israf olunur. Daha müasir yuma metodlarından istifadə etməklə sudan istifadəni azaltmaq olar. Eyni zamanda hər bir avtoyuma məntəqəsi bu sudan bir dəfə deyil, ən azı iki dəfə istifadə edə bilər. Yəni ilkin olaraq çirklənən suyu kənarlaşdırmaq olar. Amma ikinci yumada istifadə olunan suyu yenidən maşınların yuyulmasına sərf etmək olar. Bu, həm bizim avtoyuma məntəqələrində su israfının qarşısını alar, həm də kiçik sahibkarların aylıq xərclərinin azalmasına imkan verər”.
Milli Məclisin deputatı, Təbii sərvətlər, energetika və ekologiya komitəsinin sədri Sadiq Qurbanov isə bildirib ki, Azərbaycan çox azsulu ölkələr siyahısındadır. Qarşıda dünyada, o cümlədən də respublikamızda su resurslarının azalması gözlənilir:
“Doğrudur, Azərbaycan regionda çox azsulu ölkədir. Bizim ərazilərimizdə formalaşan suyun həcmi Ermənistan və Gürcüstandakından müvafiq olaraq 3 və 6 dəfə azdır. Toplanan suyun böyük həcmi isə transsərhəd çayları hesabına formalaşır”.
