Sumqayıtda evə silahlı basqın edərək 3 nəfəri öldürməkdə və 3 nəfəri yaralamaqda təqsirləndirilən Müşfiq Tağıyevin barəsindəki hökmdən kassasiya şikayəti verilib.
Pravda.az-ın məlumatına görə, hadisə 2023-cü il oktyabrın 28-də saat 05:50 radələrində Corat bağları yaşayış massivində qeydə alınıb.
Fərdi yaşayış evində açılan atəş nəticəsində Susana Karakaş və Dağbəyi Fərəcov hadisə yerində ölüb. Yaralanan Serkan Karakaş isə sonradan Türkiyədə müalicə aldığı xəstəxanada vəfat edib. Digər şəxslər - Tərlan Fərəcova, eləcə də köməyə gələn qonşular Etibar və Mehman Sarıyev müxtəlif dərəcəli xəsarətlər alıblar.
İstintaqla müəyyən edilib ki, 1987-ci il təvəllüdlü Müşfiq Tağıyev qonşusu Anar Fərəcovdan qisas almaq məqsədilə ailənin yaşadığı evə gələrək əvvəlcə divarlara benzin tökərək yanğın törədib, hazırladığı partlayıcı qurğunu işə salıb, daha sonra isə evdən çıxan şəxslərə atəş açıb. Nəticədə üç nəfər qəsdən öldürülüb, bir neçə şəxsə və iki azyaşlıya qarşı isə qəsdən adam öldürməyə cəhd edilib.
Ona Cinayət Məcəlləsinin qəsdən adam öldürmə, adam öldürməyə cəhd, əmlakı yandırma və partlatma yolu ilə məhv etməyə cəhd, habelə qanunsuz silah və partlayıcı hazırlama və saxlama maddələri ilə ittiham irəli sürülüb və barəsində həbs qətimkan tədbiri seçilib.
Sumqayıt Ağır Cinayətlər Məhkəməsinin hökmü ilə Müşfiq Tağıyev ömürlük azadlıqdan məhrum edilib. Apellyasiya şikayəti təmin olunmayıb. Hazırda iş üzrə kassasiya baxışı davam edir və şikayət Ali Məhkəməsinin hakimi Nazim Mövsümovun sədrliyi ilə araşdırılır.
