Sumqayıt şəhərində içməli sudan qanunsuz istifadə halları aşkarlanıb. Sumqayıt24 bu haqda 11 iyul tarixində “Azərsu” ASC-yə istinadən xəbər verir.
Azərbaycan Dövlət Su Ehtiyatları Agentliyi nəzarət tədbirləri keçirib. Bu zaman 76-cı məhəllə adlanan ərazidə fərdi yaşayış evlərinin tikintisi ilə məşğul olan şəxslər texniki şərt almadan, müqavilə bağlamadan su şəbəkəsinə qeyri-qanuni birləşmələr verərək mənzilləri içməli su ilə təmin ediblər. Bundan əlavə, adıçəkilən ünvanda bir neçə həyət evinin sudan uçotsuz istifadə etdiyi aşkarlanıb. Mənzil sahibləri yaxınlıqdakı magistral xəttə birləşmə verərək suyu talayıblar. Qəza briqadası tərəfindən qeyri-qanuni çəkilmiş su xətləri aradan qaldırılıb.
Yoxlama zamanı kommersiya obyektlərində də qanunsuzluqlar müəyyən edilib. 6-cı mikrorayonda yerləşən “Cafe shop” kafesinin sahibi texniki şərt almadan, müqavilə bağlamadan özbaşına yaxınlıqda yerləşən yaşayış binasının su xəttinə qoşulma edib. Analoji vəziyyətə 12-ci mikrorayon ərazisində yerləşən “Caillou Scholl” tədris mərkəzində də rast gəlinib. Obyektin icarədarına xəbərdarlıq edilsə də, o, buna məhəl qoymayaraq, belə hala təkrar yol verib. Qanunsuz xətlər kəsilərək ləğv edilib.
Mənzil və obyekt sahiblərinin diqqətinə çatdırılıb ki, içməli sudan qeyri-qanuni və sayğacdankənar istifadə şəbəkələrdə hidravliki rejimlərin pozulmasına, ciddi su itkilərinə, həmin ərazilərdə yaşayan digər abonentlərin su təchizatının pisləşməsinə səbəb olur. Qanunsuzluqlara yol verən fiziki və hüquqi şəxslərlə bağlı hüquq-mühafizə orqanlarına müraciət olunacaq.
Qeyd edək ki, bu ilin yanvar-iyun aylarında Sumqayıt üzrə 202 belə fakt aşkarlanıb.
