Sumqayıt şəhəri, 4-cü mikrorayon ərazisində içməli suyun verilişində ciddi problemlər yaşanır.
Sumqayit24.az-a müraciət edən sakinlərin sözlərinə görə, artıq bir müddətdir ki, gün ərzində su yalnız müəyyən vaxtlarda verilir:
“Su yalnız səhər saat 07:00-08:00 və axşam saat 18:00-22:00 aralığında gəlir. Yay aylarının istilərində suyun bu cür qrafiklə verilməsi bizi çətin vəziyyətdə qoyub. Gündəlik ehtiyaclarımızı qarşılamaqda çətinlik çəkirik”.
Vətəndaşlar problemlə bağlı Sumqayıt Sukanal İdarəsinə şikayət ünvanladıqlarını bildiriblər. Qurumdan verilən cavab isə heç kəsi qane eləmir:
“İdarədən deyirlər ki, mövcud vəziyyət onların səlahiyyətində deyil. Bu rejim İri Şəhərlərin Birləşmiş Su Təchizatı Xidməti tərəfindən tətbiq olunub və yay mövsümünün sonunadək bu qrafikin qüvvədə qalacağı gözlənilir”.
Sakinlər su probleminin tezliklə həll olunacağına ümid edirlər.
